डा.सुधा शाही - गजल

केही गन्तव्यमा पुग्छन् केही बाटो बिराएर जान्छन्

हरेक दिन जवान सपनाहरू हात मिलाएर जान्छन्

ठूलो पर्दाको एउटा सानो नाटकमा झैँ
केही पात्रहरू नेपथ्यमै बिलाएर जान्छन्

भत्किएका गोरेटाहरु,लथालिङ्ग पैतालाहरु
तिनीहरूले पनि त हिँड्न सिकाएर जान्छन्

कहाँ कहाँबाट आउँछन् गह्रुँङ्गा हावाहुरी
मेरो मुटुमा घरको सम्झना बिसाएर जान्छन्

यौटा सहजकर्ताझैँ अप्ठयारा परिस्थितिहरुले
बारम्बार मलाई आफैसँग चिनाएर जान्छन्

केही मसँग हाँसेर जान्छन् केही रोएर जान्छन्
केही मान्छेहरू मनसँग मन मिसाएर जान्छन्